Неверојатно откритие: Археолозите пронајдоа бронзен меч стар 3.000 години
Германските археолози пронајдоа извонредно сочуван меч, од бронзеното време стар повеќе од 3.000 години, пренесува „Би-би-си“.
Истражувањата од Државна канцеларија за заштита на спомениците во Баварија, откриваат дека бронзениот меч со октагонален држач е пронајден во гроб во јужниот град Нордлинген. Археолозите ја одредија неговата датација кон крајот на 14 век п.н.е. Неговата состојба е беспрекорна, бидејќи речиси сè уште блеска.
Во гробот кој бил истражуван, покрај бронзениот меч, најдени се скелети на маж, жена и дете, како и многу други бронзени предмети.
Археолозите не се сигурни дали трите индивидуи биле во роднинска врска, а реткоста на ова откритие им отвора нови прашања за потеклото на мечот.
Производството на ваков уникатен меч било комплицирано, бидејќи рачката била дополнитено прикачена на сечилото. Се чини дека мечот од Нордлинген не бил искористен при борба, но неговата намена, сепак не била само декоративна.
Дополнителните истражувања ќе помогнат да се прецизира датацијата на останатите пронајдени предмети.