Во четвртиот натпревар од првата рунда во НБА плеј-офот екипата на Милвоки Бакс со 121:106 триумфираше над Орландо Меџик за предност од 3:1 во серијата. Петтиот меч ќе се игра в среда од 22.00 часот.

„Магичните“ не се предаваа така лесно, пред последните 12 минути имаа само „минус“ три против едни од фаворитите за титулата оваа сезона.

Но, потоа блесна Крис Мидлтон кој беше незапирлив и со серија од 18:3, Милвоки дојде на високи +17 позитива, по што беа решени сите дилеми околу победникот.

Значајна улога во победничкиот клуб имаше Јанис Адетокумпо, кој мечот го заврши со 31 поен, 14 скока и осум асистенции. Го следеше Мидлтон со „дабл-дабл“ учинок од 21 поен и 10 скока.

Повторно најдобар во редовите на Орландо беше Никола Вучевиќ, црногорскиот центар запиша 31 поен, додаде 11 скока и седум асистенции.

Втор стрелец беше Теренс Рос со 19 поени, зад него на листата стрелци се најдоа Маркел Фулц со 15 поени поени, по 12 имаа Иван Фурније и Гери Кларк.

Победникот од дуелот Милвоки-Орландо (1:3) во конференциското полуфинале на Истокот ќе се сретна со подобриот од пресметката Индијана-Мајами (0:3). Во оваа конференција веќе е комплетирана првата полуфинална двојка, Бостон ќе ги одмери силите против Торонто.