Навални објави снимка од шишето од кое е отруен (ВИДЕО)
Тимот на отруениот критичар на рускиот претседател Владимир Путин, Алексеј Навани објави многу интересно видео на својот службен Инстаграм профил.
Тимот на Навални во објава на Твитер тврди дека водечкиот критичар на Путин е отруен преку шише вода во хотелската соба во Томск во која престојувал непосредно пред летото на кој му се слошило. Пред тоа се сметаше дека Навални е отруен на аеродромот непосредно пред летот.
Во објавата што Навални ја сподели на неговиот инстаграм-профил се наведува дека траги од новичок, нервен агенс со кој тој беше отруен, се пронајдени на празното шише вода од неговата хотелска соба во сибирскиот град Томск.
Во објавата стои дека спорното шише со вода било едно од бесплатните шишиња кои на Навални му се оставени во хотелот.
Како што јави Ројтерс, видеото ги прикажува членовите на тимот на Навални како ја пребаруваат неговата хотелска соба на 20 август, еден час откако му се слоши.
„Одлучивме да собереме се што хипотетички би можело да биде корисно и да го предадеме на лекарите во Германија. Фактот дека тоа не би било истражувано во Русија е прилично очигледен“; стои во објавата.
Снимката прикажува како неговиот тим зема две празни шишиња вода, заедно со уште низа предмети, при што користат заштитни ракавици.
„Две недели подоцна, германската лабораторија пронајде траги од новичок на шишето вода кое го зедовме од хотелот во Томск“, стои во објавата на Инстаграм.
„После тоа повеќе лаборатории ги анализираа примероците и потврдија дека Навални е отруен токму со новичок. И сега ни е јасно: отруен е пред да тргне од хотелот кон аеродромот“, стои во објавата.
Инаку, на Навални му се слоши на летот во Русија минатиот месец, а неколку дена потоа е префрлен на лекување во Берлин. Германија потврди дека е отруен со новичок, нервен агенс развиен во Советскиот Сојуз.
Навални жртва на труење: Што претставува новичок и како функционира?
Берлин побара стручна помош во истрагата за „Случајот Навални”