Непосредно пред новогодишните празници Асоцијацијата на архитекти на Македонија ја врачи Големата годишна награда за најуспешна архитектонска реализација за 2025 година, а покровител на наградата е претседателката Гордана Сиљановска-Давкова.

Лауреати на Големата годишна награда за најуспешно реализирано архитектонско дело во 2025 година се авторите Искра Лековска и Владимир Лековски од архитектонското студио „Лелелеле“, за проектот Православен храм – црква „Св. Рамноапостоли цар Константин и царица Елена“ во Скопје.

На пригоден настан во Архитектонскиот факултет наградата им ја врачи претседателката Сиљановска-Давкова, во својство на покровителка на наградата. Според неа, изборот на добитниците се темели на строга и аргументирана стручна опсервација на делата, во потрага по она што ги надминува професионалните стандарди и воспоставува нови критериуми во современата архитектонска практика.

Претседателката потсети дека архитектурата, како триаголник на наука, уметност и општествен ангажман, има суштинско влијание врз убавината и функционалноста на јавниот простор, односно врз квалитетот на урбаното живеење.

Во услови на забрзана урбанизација, финансиски интереси и економски притисоци, архитектот, според неа, има обврска да го штити јавниот интерес и да го брани јавниот простор, просторот како заедничко добро, градејќи рамнотежа меѓу потребите на сегашноста и одговорноста кон иднината.

За авторите на награденото архитектонско дело, црквата „Св. Константин и Св. Елена“ е метафора за македонската колективна меморија и идентитет и ја персонифицира хармонијата меѓу небото и земјата, духовното и световното, традицијата и современоста.

Комисијата за Големата годишна награда беше во состав: архитект Мето Хаџи Андов – претседател на комисијата и членовите архитект Јагода Мицајкова, проф. Анета Христова, архитект Бранислава Ѓорѓевиќ и архитект Даница Јурмовска.

(Текстот е објавен во „Културен печат“ број 315, во печатеното издание на весникот „Слободен печат“ на 10-11.1.2026)