Во воздушен напад на израелските вооружени сили насочен кон училиште кое беше функционирало како засолниште за внатрешно раселени лица во Појасот Газа, загинаа најмалку 20 Палестинци, а десетици се ранети, изјавија работници од службите за итни случаи за новинската агенција Ројтерс во раните утрински часови.

Ова е училиште во населбата Дараџ во градот Газа, велат извори за агенцијата.

Кратко пред новото бомбардирање на Израел, шпанската влада предложи воведување меѓународно ембарго за оружје врз Израел, со цел да изврши притисок врз него да ја прекине војната и хуманитарната катастрофа во Појасот Газа, според нејзиниот шеф на дипломатијата.

„Сите мора да се согласиме“ за воведување „заедничко ембарго за оружје“, изјави шпанскиот министер за надворешни работи Хозе Мануел Алварез пред новинарите на почетокот на министерскиот состанок на таканаречената Мадридска група во шпанската престолнина синоќа. „Последното нешто што му треба на Блискиот Исток во моментов е оружје“, додаде тој.

Шпанскиот министер за надворешни работи, исто така, се залагаше за „итна суспензија“ на договорот за асоцијација на Европската Унија со Израел – мерка што почна да се разгледува во Брисел – и за воведување целни санкции врз поединци кои „го попречуваат решението за две држави“.

Доколку е потребно, санкциите треба да се воведат лично врз израелскиот премиер Бенјамин Нетанјаху, речр Алварес.

„Ништо што го дискутираме овде не е насочено против државата Израел“, истакна шпанскиот министер за надворешни работи. Сепак, додаде тој, палестинскиот народ има потполно исто право како и израелскиот народ да живее мирно и безбедно“.

Нема алтернатива на решението со две држави за постигнување траен и праведен мир, рече Алварез. Ваквото решение сегашната израелска влада категорично го отфрла.

За време на интервјуто што го даде претходно за француската телевизиска мрежа Франс Инфо, шефот на шпанската дипломатија праша „која е алтернативата?“. Да ги убијат сите Палестинци? Да бидат транспортирани (…) Не знам каде — на месечината? Дали треба да им се даде израелско државјанство?

Шпанската влада е меѓу најострите критичари на начинот на кој владата на израелскиот премиер Нетанјаху ја води војната во Појасот Газа.

Во септември тој го организираше првиот состанок на таканаречената Мадридска група.

На овој втор самит учествуваат министри и високи функционери од околу 20 земји од Европа и арапскиот свет, како и од Бразил и меѓународни организации.

Германија, која вчера учествуваше за прв пат, беше претставувана од државниот секретар за надворешни работи Флоријан Хан.

Од почетокот на војната во Појасот Газа на 7 октомври 2023 година, најмалку 53.939 Палестинци, повеќето од нив цивили, ги загубија животите во големи израелски воени операции, според најновите бројки од Министерството за здравство на владата на Хамас во енклавата, кои ОН ги сметаат за веродостојни. Најмалку 122.700 други се повредени.

Во невидениот напад на военото крило на Хамас врз јужниот дел од израелската територија, што ја предизвика војната, според официјалните израелски податоци, животот го загубија 1.218 лица, од кои повеќето цивили.