Националната платформа падна на првиот тест
Учениците ширум земјава од денеска започнаа со тестирање на Националната платформа за далечинско учење, откако викендов им беа доделени лозинки со кои им е овозможен пристап до неа.
Платформата падна на првиот тест, откако повеќе родители и ученици денеска не можеа да се најават на неа.
Од Министерството за образование и наука смируваат, односно велат дека тоа е дел од тестирањето и станува збор само за моментални проблеми со поврзувањето на платформата.
– Тестирањето е дел од постапката за постигнување на целосна функционалност на платформата, и во тест фазата се детектираат и надминуваат сите предизвици. Со цел да обезбедиме потполно функционална платформа до почетокот на учебната година тестирањата продолжуваат и во наредните денови – велат од МОН.
Денеска и утре се очекува сите ученици ширум земјава да ја тестираат Националната платформа, со цел да се види нејзината издржливост пред стартот на новата учебна година која започнува во четврток.