13 C
Скопје

На ред е Македонија да се бори за Гоце Делчев

Премиерот Зоран Заев и претседателот Стево Пендаровски не дојдоа лично на гробот на великанот во Скопје. Заев последен пат тоа го стори на Илинден во 2019 година, а Пендаровски минатата есен.

Македонија денеска ја одбележа 118. годишнина од смртта на македонскиот револуционер Гоце Делчев, а највисокиот државен врв, премиерот Зоран Заев и претседателот Стево Пендаровски, не дојдоа лично на гробот на великанот во црквата „Свети Спас“ во Скопје. Владината делегација ја сочинуваа министерот за внатрешни работи Оливер Спасовски, министерката за култура Ирена Стефоска и министерот за финансии Фатмир Бесими, а делегацијата од Кабинетот на Пендаровски ја предводеше генералниот секретар Миле Бошњаковски. Цвеќе на гробот положија и потпретседателот на Собранието Горан Мисовски и пратеничките Даниела Маркоска и Велика Стојкова Серафимовска, како и здруженија и граѓани.

– Сеќавањето на годишнината од смртта на Гоце Делчев, како знаменосец на македонската револуционерна борба е и чествување на вредностите што тој ги застапуваше во борбата за слобода и за македонската државност – напиша владината служба во пригодното соопштение.

Премиерот Заев присуствуваше на 115. годишнина од смртта на Делчев во 2018 година, а двапати се поклони заедно со бугарскиот премиер Бојко Борисов при заедничките одбележувања на Илинден, во 2017 и во 2019 година. Претседателот Пендаровски еднаш оддаде почит пред гробот на револуционерот лани во септември, заедно со словенечкиот претседател Борут Пахор.

Делегацијата на опозициската ВМРО-ДПМНЕ денеска ја предводеше генералниот секретар Ѓорѓија Сајкоски кој истакна дека Делчев е македонски, а не бугарски револуционер.

– Ние знаеме дека Гоце Делчев беше човекот со луѓето од револуционерната организација што во секој македонски дом направи револуционерно огниште. Од она што го знаеме и анализираме, гледаме дека тој се борел за самостојна, независна Македонија. Немам прочитано дека нешто направил за бугарската држава – рече Сајкоски.

Во изминативе години Бугарија се обидува да наметне свое видување на историската улога на Делчев, за што се водат безуспешни расправи во Комисијата за историски и образовни прашања.
Делчев е еден од најзначајните личности од македонската историја, кој се борел за ослободување на Македонија од турската власт и загинал на 4 мај 1903 година во Баница. Неговите посмртни останки се чувале во Баница до 1917 година, кога биле пренесени во Ксанти, а потоа во Софија. На 11 октомври 1946 година биле пренесени во црквата „Свети Спас“ во Скопје.

По повод годишнината Македонската филхармонија задутре ќе одржи концерт под диригентската палка на Христо Христов од Бугарија. На репертоарот се дела од Григ, Хендл, Маскањи, Моцарт, Сибелиус, Вагнер, Офенбах и Бизе.

Поврзани вести

ВИДЕО | Се слушна ѕвоното во Детската клиника: Малата Ана ја доби борбата со болестите

Слободен печат

Утре се одбележува Денот на Европа и Денот на победата над фашизмот

Слободен печат

Бегал од полиција, па со 140 км на час удрил во лежечки полицаец

Слободен печат

Двајца станари со деменција побегнале од старечкиот дом во Тенеси благодарение на воената обука, персоналот казнет

Слободен печат

Деспотовски: Заврши времето на евтина работна сила, немаме луѓе за извоз

Слободен печат

Успорената демографија нема да ја сопре Кина

Гидеон Рахман/Financial Times

Остави Коментар