Против пет романски лекари, од кои еден е приведен, е покрената истрага поради сомнеж дека продале стотици пејсмејкери извадени од починати пациенти, го пренесе РТС соопштението на романското обвинителство.

– Еден од петте лекари, кои работеле во болница во Јаши, се наоѓа во притвор додека трае истрагата под обвинение за злоупотреба на службената положба и примање поткуп – наведело обвинителството.

Уапсениот лекар, како што е објаснето, надгледувал група од четворица други лекари, кои му доставувале импланти за срце извадени од починати пациенти без нивно или одобрение од нивните семејствата.

Лекарот е осомничен дека извршил 238 операции од 2017 година користејќи импланти од починати пациенти или од непознато потекло, со што неговите пациенти биле изложени на опасност од компликации или смрт.

– Голем број од тие импланти, кои лекарот ги препорачал, не биле неопходни и биле препорачани врз основа на лажни дијагнози или претходно препишани лекови што би довеле до одредени симптоми – соопштиле од обвинителството.

Романскиот здравствен систем, како што се вели во коментарите со кои е проследена оваа информација, е поткопан од корупција, неефикасност и од политичко влијание.