На денешен ден, пред 26 години, нè напушти легендарниот Јонче Христовски, автор и изведувач на некои од најпознатите македонски народни песни.

Христовски го облагороди македонскиот мелос со незаборавни песни, исполнети со љубов кон Македонија, животот и песната.

Со својата изведба на „Македонско девојче“ во 1964 година, песната стана симбол на љубовта кон македонската жена и беше препеана на бројни јазици – од англиски и германски до италијански и руски.

Тој создаде сопствен интерпретативен стил, препознатлив и комуникативен со публиката – со фрлање на палтото, бакнување на земјата и со боемски, мераклиски настапи што го правеа омилен кај публиката.

Неговите песни „Ај засвирете ми чалгии“, „Запеј песна Македонко“, „Ако умрам ил загинам“, како и патриотските „Едно име имаме“, „Ој, Вардаре македонски“ и „И ние сме деца на Македонија“ сè уште се пеат и чувствуваат со истата емоција.

Многумина го паметат и како еден од најактивните членови на ансамблот „Танец” (пејач и играорец). Најомилено оро му беше „Калајџиското“.

Како одговорен за народната музика во националната телевизија – ТВ Скопје, ја иницираше и ја реализира серијата „Распеани градови” (1974), која се памети како еден од најзначајните проекти на ТВС.

Христовски бил женет и татко на две ќерки. Неговата сопруга трагично го загубила животот во катастрофалниот Скопски земјотрес 1963 година и токму на неа и за љубовта кон неа, Христовски ја посветил и напишал една од своите најпознати песни – „Животе мој“.

Во 2002 година во Скопје е основан ансамбл за народни песни и игри кој го носи неговото име, a македонско културно уметничко друштво со неговото име постои и во Германија.