Македонскиот кошаркарски шампион МЗТ Скопје се враќа од Србија со убедлив пораз, откако на гостувањето кај Златибор загуби со 102-74 во рамките на 5. коло од АБА 2 лигата.

Аеродромци имаа солиден настап во првите 20 минути, но целосно потфрлија во продолжението, што резултираше со втор пораз сезонава во второто по ранг јадранско натпреварување.

Избраниците на Атанасов добро го отворија натпреварот и во воведот имаа минимална предност (11-9), но Златибор брзо фати ритам и со серија дојде до 24-17. Сепак, МЗТ успеа да се врати во игра и по првата четвртина заостануваше само еден поен (29-28).

Во втората четвртина домаќинот повторно ја презеде контролата и на полувреме имаше плус пет (54-49), разлика која во тој момент изгледаше достижна за македонскиот шампион.

Но, следуваше целосен колапс во второто полувреме. МЗТ влезе во сериозни проблеми со реализацијата, додека Златибор сигуррно ја зголемуваше предноста, па на крајот стигна до висока и заслужена победа од 102-74.

Чарлс Гил беше прво име кај МЗТ Скопје со 24 поени, Смит додаде 13, а Мекеден заврши со 10. Кај победничкиот состав на Златибор, најефикасен беше Мур со 28 поени.

Преземено од: Спорт.ком.мк