Управата на МЗТ Скопје Аеродром денеска упати официјален допис до АБА-лигата и до сите екипи кои настапуваат во прволигашката конкуренција од ова натпреварување, со цел да се свика итен состанок на Собранието на АБА лигата. 
На Собранието би се разговарало за најавеното откажување на Копер Приморска и на кое само би се потврдила веќе донесената одлука за влез на нашиот клуб меѓу најдобрите на просторот на поранешна СФРЈ.

„Од разговор со клубовите како и од медиумите од регионот, неофицијално, дознавме за проблематичната ситуација со Копер Приморска, за нивното распуштање на екипата, односно за најавата на овој клуб дека ќе се повлече од настапот во АБА-лигата.

Поради ова, како еден од основачите на ова натпреварување и како ко-сопственик на акционерското друштво АБА ЈТД, би сакале да ја нагласиме потребата за итен состанок на Собранието на АБА ЈТД, на кое би се разговарало на оваа тема и на кое, ако се потврдат претходните најави, само формализира веќе усвоената одлука за промовирање на МЗТ Скопје Аеродром во Првата АБА-лига. Како што сте запознаени, на Собранието одржано на 16 јули 2020 година, беше решено МЗТ Скопје Аеродром да добие специјална покана за Првата АБА-лига во ситуација некоја екипа да се откаже, а што сега би се можело да се случи. Согласно тоа, очекуваме дека следниот собир на Собранието на АБА ЈТД-лигата, за која веруваме дека ќе се случи во најкус можен рок, само формално ќе ја спроведе оваа одлука.

Навистина ни е жал за ситуацијата во која се најде Копер Приморска, тим кој пред две сезони ни беше голем конкурент за пласман во елитата, кога играме во финалето од плејофот во АБА2-лигата. Како конкуренти се уверивме во сјајниот квалитет на овој тим, како и во одличната организациска структура која стоеше зад него

Но, како што разбравме, челниците на Копер Приморска веќе најавиле откажување од АБА-лигата, нешто што реално висеше во воздух неколку месеци наназад. За нашиот клуб, играњето во регионалното натпреварување е од огромно значење, поради што сакаме да имаме чиста слика за тоа каде ќе настапуваме, со цел да се организираме на највисоко ниво и пред сѐ да (до)обезбедиме средства за што поквалитетен настап против големите имиња кои настапуваат во Првата АБА-лига.

Оваа лига е вистински дијамант со непроценлива вредност, чиј сопственик сме сите заедно, поради што мораме да ја штитиме и да ѝ овозможиме да вреди уште повеќе на кошаркарскиот пазар. АБА е производ на кој ни завидуваат сите други спортови, со стабилни финансии, поради што наша обврска е да дадеме сѐ од себе таа од ден на ден да биде уште посилна.

Како клуб, чија главна цел секогаш била играње во елитното јадранско друштво, се надеваме дека ќе го прифатите нашиот апел и ќе поддржите свикување итен состанок на Собранието на АБА ЈТД, на кое само формално ќе биде потврдена одлуката за прием на МЗТ Скопје Аеродром. Тоа, секако, би било прифатено со еуфорија не само од нашите навивачи, туку и од целата спортска јавност во Македонија, која со нетрпение сонува да ги види своите миленици како играат против најсилните клубови од регионот“, стои во соопштението на МЗТ Скопје Аеродром.