МЗТ и Работнички ќе почекаат на календарот во АБА2 лигата
Натпреварите во АБА конкуренцијата нема да почнат на средината од месец септември…
Почетокот на АБА лигата, соглсно со тоа и на АБА 2 натпреварувањето, е поместен за почетокот на октомври, одлучено е на Собранието на регионалната лига.
Со оглед на тоа дека веќе е најавено дека наместо во деветтиот, лигата може да „заживее“ во десеттиот месец од оваа година, одлуката мораше да биде потврдена на највисокиот собир на АБА-лигашите.
Првобитно, новата сезона во Лигите на Јадранот требае да почне на 19.септември, но сега љубителите на кошарката, и секако, сите клубови вклучени во системот на натпреварување ќе мора да почекаат најмалку две седмици.
Причината за одложувањето е лошата епидемиолошка ситуација со корона вирусот, и порастот на заразени луѓе во сите држави од каде доаѓаат клубовите од АБА натпреварувањата.
Исто така, не е познат ниту распоредот на натпреварите во двете конкуренции, па согласно со тоа нашите претставници во АБА2 лигата, екипите на МЗТ Скопје Аеродром и Работнички, ќе мора да почекаат на дефинитивниот календар за сезоната 2020/2021.
АБА лигата беше прекината уште во месец март поради пандемијата на вирусот Ковид-19. Пред крајот на мај, Собранието донесе одлука натпреварувањето да не продолжи, без промоција на шампион, ниту пак испаѓање во понизок ранг на натпреварување.