Покрај дванаесетте пациенти со цистична фиброза, кои веќе го добиваат лекот Трикафта, Министерството за здравство најави дека овие денови со терапија се вклучуваат и нови пациенти.

Минатата недела две нови пациентки примија Трикафта, а денеска се вклучуваат уште двајца, а во петок се очекува лекот да го примат уште двајца пациенти.

Оваа група на пациенти етапно се вклучува на терапија, согласно Протоколот и прецизни критериуми на евалуација се одлучува за добивањето терапија. Листата на пациенти е направена од Стручна Комисија, по направени медицински прегледи на сите пациенти со цистична фиброза, според бодирање. Лекот Трикафта е безбеден лек, одобрен од Европската медицинска агенција. Ефектот од терапијата е брз, значителен и одржлив – додаваат од Министерството.

Две пациентки со цистична фиброза го примија лекот Трикафта

Минатиот месец на Клиниката за детски болести пристигна терапија за 12 пациенти со цистична фиброза. Министерот за здравство д-р Фатмир Меџити најави дека дополнително се предвидени 854 милиони денари за лекот, за 2024 и 2025 година, со што во следните две години пациентите со цистична фиброза се обезбедени со терапија.

Поранешната директорка на Клиниката за детски болести, д-р Стојка Нацева-Фуштиќ појасни дека е обезбедена терапија за 12 пациенти, а селектирано постепено ќе има вклучување на нови седум пациенти на секои десет дена.

Таа информираше дека освен тие 12 пациенти кои се веќе на терпија има уште 55 лица и дека за сите тие ќе биде обезбедена терапија во текот на 2024 година.