Музејска дејност: МНК ИКОМ го објави конкурсот за наградата „18 Мај“
Македонскиот национален комитет на Меѓународниот совет на музеите (МНК ИКОМ) го објави конкурсот за доделување на годишната награда „18 Мај – Меѓународен ден на музеите“ за особени достигнувања во музејската дејност за претходните две години. Целта на наградата е да ја поттикне, популаризира и да ја афирмира музејската дејност. Поради пандемијата, наградата ќе се додели одвоено за 2019 и 2020 година.
Наградата на МНК ИКОМ се доделува во неколку категории: музеј на годината, музејски проект на годината, музејски работник на годината и надворешен музејски соработник. Пријавените проекти треба да содржат име, презиме и адреса на авторот, назив и адреса на институцијата, опис на проектот и прилози за проектот во печатена или во електронска форма. Материјалите треба да бидат доставени најдоцна до 7 мај по пошта или рачно на адресата на МНК ИКОМ или на електронска пошта: [email protected].
(Текстот е објавен во „Културен печат“ број 78, во печатеното издание на „Слободен печат“ на 24-25 април 2021)