Мултимедијален настан: Уметнички скок преку границите
Изложбата „Во длабоко и танцувајте“ на визуелната уметница Весна Стефановска од 4 до 23 септември е поставена во Музејот на современата уметност во Скопје.
Визуелната уметница Весна Стефановска живее и работи во Франција и затоа изложбата „Во длабоко и танцувајте“ е само втора нејзина самостојна изложба во нашата земја. Претходно се претставила со изложбата „Прозорец“ во 1997 година, а во меѓувреме учествувала на изложбата „Нарцисизми“ во 1999 и го направила перформансот „Ничија“ пред Универзалната сала во 2018 година.
Изложбата „Во длабоко и танцувајте“ содржи десетина дела од 1998 година, меѓу кои има инсталации во простор, видео инсталации, перформанс и реди-мејд содржини, групирани и артикулирани во циклусите „Отсуство“, „Возови рефлексии“, „Дојдете да видите како пoминува времето“, „Ничија“ и „Часовник“.
На изложбата премиерно се претставени инсталацијата и перформанс од делото „В кревет“, истражување на нашиот однос кон потсвеста и интимноста. Во сценографијата на изложбата, конципирана од самата авторка, Весна Стефановска го прегрнува речиси целиот нејзин уметнички опус, ставајќи го акцентот на делата реализирани од почетокот на 2000-тe години и група нови досега неприкажани дела.
Паралелно со поставката во Музејот на современата уметност, а во склоп на изложбата „Во длабоко и танцувајте“, авторката нуди уште две инсталации во јавен простор под наслов „Возови рефлексии“ во Старата железничка станица и „Отсуство“ на друга локација во градот, трансгресирајќи ги на тој начин границите помеѓу ентериер и екстериер, тука и таму, отворен и затворен, личен и јавен простор.
Како дел од овој пристап кон просторот инсталацијата „Отсуство“ ќе биде реализирана во повеќе збратимени градови на Скопје во странство и на пошироко интернационално ниво. Изложбата е реализирана со поддршка и соработка со Музејот на современата уметност, Град Скопје, Министерството за култура на РСМ и Францускиот институт во Скопје.
(Текстот е објавен во „Културен печат“ број 47, во печатеното издание на „Слободен печат“ на 5-6 септември 2020)