Министрите за надворешни работи од европските земји, Австралија и Велика Британија во петокот заеднички ги осудија плановите на Израел за изградба на населба источно од Ерусалим, пренесува Ројтерс.

Одобрувањето на проектот „Е1“ би го преполовил Западниот Брег и би го отсекол од Источен Ерусалим, фрагментирајќи ја територијата што Палестинците ја бараат за независна држава.

Ова беше објавено минатата недела од крајно десничарскиот израелски министер за финансии Безалел Смотрих и доби конечно одобрение од комисијата за планирање на Министерството за одбрана во среда.

„Одлуката на израелскиот Комитет за високо планирање да одобри планови за изградба на населби во областа Е1, источно од Ерусалим, е неприфатлива и претставува кршење на меѓународното право“, се наведува во заедничката изјава на министрите за надворешни работи.

„Ја осудуваме оваа одлука и повикуваме на нејзино итно поништување на најсилен начин“, изјавија министрите од Австралија, Белгија, Велика Британија, Канада, Кипар, Данска, Естонија, Финска, Франција, Грција, Исланд, Ирска, Италија, Јапонија, Латвија, Литванија, Луксембург, Малта, Холандија, Норвешка, Полска, Португалија, Словенија, Шпанија и Шведска.

Шефицата за надворешни работи на ЕУ, Каја Калас, која е потпретседател на Европската комисија, се придружи на изјавата.

Израел веднаш ја отфрли изјавата, велејќи дека „го отфрла обидот за наметнување странски диктати врз него“.

„Историското право на Евреите да живеат насекаде во земјата Израел – родното место на еврејскиот народ – е неоспорно“, се вели во соопштението на израелското Министерство за надворешни работи, додавајќи дека Израел дејствува во согласност со меѓународното право.

„Еврејскиот народ е домородното население на земјата Израел. Во ниту еден момент од историјата не постоела палестинска држава и секој обид да се тврди спротивното нема никаква правна, фактичка или историска основа“, се вели во соопштението.

Планот за населба Е1 е широко осуден во странство.

Израел ги зазеде Западниот Брег, Источен Ерусалим и Газа во Блискоисточната војна во 1967 година и ги прошири населбите на Западниот Брег додека ја продолжува војната со Хамас во Газа. Околу 700.000 израелски доселеници сега живеат меѓу 2,7 милиони Палестинци на Западниот Брег и Источен Ерусалим.

„Овој план ќе го оневозможи решението за две држави со поделба на која било палестинска држава и ограничување на палестинскиот пристап до Ерусалим“, се вели во соопштението на министрите, во кое се повикува израелската влада да го повлече планот.