„Ми го убија братот…“: Софија Вергара проговори за семејната трагедија во Колумбија
Во моментов, колумбиската актерка Софија Вергара (51) ужива голема популарност поради улогата на озогласената Гризелда Бланко во серијата на Нетфликс – „Гризелда“ („Griselda“). Таа успешно ја отелотвори шефицата на колумбискиот картел, позната и како „кралицата на кокаинот“.
Во своето најново интервју за „Дејли мејл“, Вергара се присети на детството во Колумбија и на големата семејна трагедија. Имено, нејзиниот најстар брат Рафаел бил убиен од страна на криминална организација која се занимавала со криумчарење дрога.
„За жал, во Колумбија во тоа време пипалата на трговијата со дрога беа насекаде. Не можам да кажам дека сите беа дилери на дрога, бидејќи тоа не е точно. Но, на пример, ако сте архитект, кој ви ги купил становите? Ако имате салон за автомобили, кој ви ги купил автомобилите? Криминалците. Секој знаеше кои се дилери на дрога. Сè беше допрено од нив. Брат ми беше мило момче. Но, тој донесе погрешна одлука и, за жал, плати за тоа. Сите плативме за тоа“, изјави актерката.
Убиството на нејзиниот брат засекогаш го променило нивното семејство.
„Кога ќе умре некој толку посебен, добар татко и брат, тоа го уништува семејството. Мајка ми и татко ми никогаш не беа исти. Мојот друг брат, кој беше многу близок со него, поради траумата стана алкохоличар, а потоа и зависник од дрога“, додаде таа.
Меѓу другото, Вергара се осврна и на разводот со нејзиниот, сега веќе, поранешен сопруг Џо Манганиело.
„Џо беше четири години помлад од мене, а немаше деца. Реши дека сака да има дете, а јас сум премногу стара за тоа. Замислете, кога тоа дете ќе имаше 10 години, јас ќе имав 60“, сподели актерката во интервјуто.
Да потсетиме, Софија Вергара и Џо Манганиело беа во брак седум години. Двојката реши да се раздели во јули минатата година.
„Донесовме тешка одлука да се разведеме. Како две лица кои се сакаат и се грижат еден за друг, љубезно замолуваме за почитување на нашата приватност во овој период, додека се движиме низ оваа нова фаза во нашите животи“, стоеше во нивното соопштение.