Од Њујорк до Сан Франциско и од Чикаго до Атланта, се очекува милиони демонстранти повторно да излезат на улиците низ САД утре, во сабота, за да протестираат против политиките на Доналд Трамп и да „ја бранат демократијата“ на повик од движењето „Без кралеви“, објави Фокс Њуз.

Претходниот национален ден на мобилизација на оваа коалиција, која се спротивставува на Доналд Трамп и обединува околу 300 организации, веќе мобилизираше милиони луѓе низ целата земја кон средината на јуни – истиот ден како и воената парада организирана од републиканскиот претседател во Вашингтон. Тоа беше најголемата мобилизација што се случи до тој ден откако Трамп се врати во Белата куќа.

Четири месеци подоцна, организаторите проценуваат дека утре ќе се одржат „повеќе од 2.600“ собири „со очекување на милиони луѓе“.

„Милиони Американци мирно ќе демонстрираат во сабота за да ѝ кажат на администрацијата на Трамп дека ние сме земја каде што луѓето се еднакви, земја каде што законот важи за сите, владеење на правото и демократија“, рече еден од лидерите на важната организација за одбрана на граѓанските права и граѓанските слободи ACLU, Диадре Шифлинг, на прес-конференција преку видео врска вчера.

Соочени со „ злоупотребата на моќта од страна на Доналд Трамп и неговите сојузници“, „нема да дозволиме да бидеме замолчени“, вети Шифлинг.

„Тие ја испраќаат Националната гарда во американските градови. Ги тероризираат нашите пријатели и соседи имигранти. Ги гонат своите политички противници“, рече Лиа Гринберг , коосновач на групата „Неразделни“.

„Тоа е класичен авторитарен режим: се закануваш, клеветиш, лажеш, ги плашиш луѓето за да се покорат“, продолжи таа. „Но, нема да дозволиме да нè заплашат. Нема да дозволиме да влијаат врз нас. Нема да попуштиме.“

Ренди Вајнгартен, претседател на Американската федерација на наставници (AFT) , рече дека чувствува „морална обврска да се бори“ за да „се обиде (…) да види како демократијата се движи напред, а не да се повлекува“.

Се очекува собири да се одржат и во Вашингтон, Бостон, па дури и во Њу Орлеанс – градови каде што Доналд Трамп веќе, во првиот случај, или размислува, во другите два, да распореди воен персонал за да го нападне, како што наведува, криминалот таму.

Покрај големите градови, собири се планирани низ целата земја, дури и во градови во соседна Канада, во Торонто, Ванкувер и Отава.