Малото градско катче за перење и пеглање на Светлана
Имам желба да се врати времето кога секој одеше во градски моден салон, градска перална и пеглана, градска кафеана.
Светлана Грујовска има 60 години, таа е сопруга, мајка, баба, а од неодамна и жена претприемач. Пред да ја реализира својата претприемачка идеја ја мачеле мислите дека е тешко, дали ќе успее на само неколку години пред пензионирање, дали ќе може сето тоа да го направи сама.
– Одлучив, цврсто и женски, едноставно морав да пробам, решив да ризикувам и решив да се впуштам во бизнис како жена претприемач, која ќе го претвори во мал бизнис она што најдобро знае да го прави. Така се роди „Лотос“, градска перална и пеглана со многу љубов – вели Светлана.
Вели дека отсекогаш добивала комплименти за добро сочувана и третирана облека и ткаенини, секогаш посветувала посебно внимание на својот гардеробер и гардероберите на најблиските. Па така, решила грижата за облеката и ткаенините да ја претвори во едно мало градско катче, каде што секој ќе може да дојде и да си дозволи професионална и квалитетна услуга за пристојна цена.
– Прво се преквалификував и се стекнав со диплома за управување со професионални машини за перење и пеглање, одржување на облека и ткаенини. Потоа решив поголем дел од мојата финансиска заштеда да ја вложам во оплеменување на просторот и набавка на потребните машини, со што полека, но сигурно, се роди „Лотос“, градска перална во еден од најстарите градски делови на Скопје, во Дебар Маало – ни раскажува оваа храбра и вредна жена и ги охрабрува сите жени кои се двоумат или стравуваат дали да прифатат деловен предзивик, без разлика на нивната возраст.
– Мојата приказна нека биде мотив и поддршка за сите дека никогаш не е доцна да се впуштиш во реализирање на своите желби и замисли. Под ова небо и сонце за секого има место – вели таа.
Размислувањата од типот „Тешко е, не знам дали ќе успеам“ ѝ се вратиле на Светлана со појавата на коронавирусот. Но одлуката била поцврста од сè. А после неколку дена веќе првите муштерии, пофалбите и нивното задоволство ја охрабриле и ја мотивирале. Додава и дека поддршката од семејството и пријателите е секогаш добредојдена.
– Годините не ги кријам. Имам 60 години, не се чувствувам остарено ниту стара, најважно е дека имам желба и мотив. Имам желба да се врати времето кога секој одеше во градски моден салон, градска перална и пеглана, градска кафеана. Искрено се надевам дека мојата градска перална и пеглана ќе прерасне во една успешна приказна, преполна со луѓе и добар стил – завршува таа.