Вчера во Пјаченца, Италија бил официјализиран договорот со кој Македонската православна црква-Охридска архиепископија (МПЦ-ОА) покрај храмот „Св. Прохор Пчински“ го добива целиот простор околу црквата, од околу пет хектари (околу 50.000 квадратни метри), кој ќе значи простор за социјално и културно зближување на бројните Македонци во овој дел на Италија, јави „Религија.мк“.

На свечениот чин, договорот го потпишаа митрополитот Европски Пимен и монсињор Адријано Чеволото, бискуп на Епархијата на Пјаченца и Бобио.

Имотот вреди 800 000 илјади евра и ќе се исплаќа 20 години, но ќе биде во трајно владение на МПЦ-ОА.

„Овој црковен простор ќе биде стожер на македонската култура, јазик и традиција. За нашите иселеници, ова значи место каде ќе можат да ги крштеваат своите деца, да ги венчаваат младите, да празнуваат, да организираат натпревари и да допринесуваат за опстојувањето на црковната заедница. Чинот на предавањето од страна на бискупот Адријано Чеволото е силна порака за братската љубов и солидарност меѓу Католичката црква и МПЦ-ОА, што дополнително го зајакнува угледот на македонската заедница во Италија“, велат од епархијата.

За верниците, овој потпис на владиката Пимен и бискупот Чеволото не е само формалност, туку и „гаранција дека македонскиот јазик и православната молитва ќе продолжат да одекнуваат во Италија“.

По потпишувањето, двајцата достоинственици разменија срдечни честитки, нагласувајќи дека грижата за верниците и нивните духовни потреби е заедничка мисија која ги надминува сите граници, пишува „Религија.мк“.