Врз основа на усвоен проект од страна на Министерството за култура и туризам, на стрип-фестивалот „Цртани романи шоу“ (CRS) во Загреб, Хрватска, ќе гостува Томе Трајков, стрип-промотор. Фестивалот ќе се одржи од 17 до 19 април во Академијата на ликовни уметности.

Фестивалот на којшто ќе учествува Томе Трајков е еден од оние со најголема традиција и рејтинг во регионот. Според Трајков, оваа работна посета е логичен континуитет на неговата меѓународна стрип-активност.

Фестивалот спаѓа во редот на Комикони, односно големи стрип-фестивали коишто се: масовно посетени од публика; имаат солидно ниво и бројка на гости, видни имиња од светската стрип-сцена, конкретно: Италија, Босна и Херцеговина, Хрватска, Ирска, Германија, САД, Франција).

Самото нивно присуство е доволен повод помеѓу публиката да има и бројни придружни манифестации, во случајов – изложби, панел-промоции, саем на стрипови со штандови, школи / работилници за цртање, косплеј-маскирање во супер херои, квизови, музички концерти и т.н.

Заедно со хроничарот Александар Стеванов како соработник, Томе Трајков ќе одржи панел-промоција на тема „Македонскиот стрип има минато, сегашност и иднина!“

Освен редовните обврски при присуството на овој фестивал, престојот ќе се искористи за стекнување на организациони искуства коишто ќе се применат во Македонија.