Друштвото за издавачка дејност „Македоника литера“ деновиве ја објави книгата на Киро Донев „Моите приказни“, која претставува избор од неговите раскази. Публикувањето се совпаѓа со 80-тиот роденден на Киро Донев и 55-годишнината од публикувањето на неговата прва книга.

Книгата „Моите приказни“ содржи 80 раскази и претставува избор од неговите книги со раскази. Почнува со неговата автобиографска приказна, а е поделена во неколку целини: „Од дневникот на Зорка Сештозборка“, „Од дневникот на Васко Пикаско“, „Дарко во Зоо паркот“, „Приказни од куќичката на дрво“ и „Приказни за годишните времиња“.

Киро Донев е меѓу најчитаните и најпреведуваните македонски писатели за деца. Досега се публикувани близу 50 негови книги, а „Моите приказни“ е десетта негова авторска книга објавена од „Македоника литера“. Живее во родното Моноспитово, Струмичко.

(Текстот е објавен во „Културен печат“ број 122, во печатеното издание на весникот „Слободен печат“ на 26-27 март 2022)