Македонија има шампион во картинг: Масимо Тасевски го освои Балканот
Сезоната 2025 во Балканскиот картинг шампионат беше една од највозбудливите досега, а македонскиот возач Масимо Тасевски го докажа својот доминантен статус со четири победи и три најбрзи круга на шесте трки што се возеа во Србија, Унгарија и Хрватска.
Препорачано
Во конкуренција од 70 возачи од повеќе балкански земји,Масимо Тасевски постигна впечатливи резултати на патеките во Белград и Кула (Србија), Кечкемет и Палоч (Унгарија) и Пореч (Хрватска). Тој го освои првото место во Белград, Пореч, Кечкемет и Палоч, а на трките во Пореч, Кечкемет и Палоч постави и најбрз круг, што дополнително ја потврдува неговата врвна форма.
Особено предизвикувачки беа трките во Унгарија, каде променливите временски услови — дожд, ветер и сонце — бараа максимална концентрација и прецизност. Тасевски се натпреваруваше со гуми за суво време, што дополнително го отежнуваше управувањето и бараше тактика на возење која постојано се менуваше од круг во круг. Според него, највпечатливи и најдоминирачки победи се оние во Кечкемет и Пореч.
„Оваа титула ми значи повеќе од било која друга, бидејќи победата на трки и освоен шампионат во странство не е лесна задача, особено кога знаеме какви услови владеат во македонскиот автомобилизам и колку многу подготовки и тренинзи се потребни.Не се откажувам од поставување нови стандарди во македонскиот автоспорт и од претставување на нашата земја во најдобро светло, како што и доликува“, изјави Тасевски.
Тасевски низ годините освоил низа награди меѓу кои:
Државниот шампионат во рентал картинг во Македонија (2018)
SWS Endurance рентален шампионат во Грција (2019)
AKLS KartingLiga шампионатот на Србија во 2024 и 2025 година
Вице-шампион на AKLS KartingLiga во 2023 година
Покрај индивидуалните успеси, тој учествува и во тимски ендурaнс картинг трки со времетраење од 4, 8, 12 и 24 часа, одржувани во Грција и Бугарија.
За крај на успешната 2025 сезона, Тасевски се подготвува за настап на престижниот Пакетес Куп во Малага, Шпанија — светски рентал картинг натпревар на кој ќе се натпреваруваат повеќе од 200 возачи од целиот свет.
Сепак, како што ни откри самиот тој, иднината останува неизвесна поради потребата од спонзори и компании кои би го поддржале во освојањето нови шампионати и настапи во следните сезони.
Преземено од: Спорт.ком.мк
