„МакеДокс“ објави Отворен повик за нова генерација „Докуникулци“
Фестивалот на креативен документарен филм „МакеДокс“ е во потрага по четвртата генерација „Докуникулци“ на возраст од 14 до 18 години, кои сакаат да бидат дел од годинешната работилница за креативен документарен филм.
Како пријава на повикот потребно е да се испрати петминутно видео со кое апликантите ќе одговорат на неколку специфични прашања поставени од екипата на „МакеДокс“.
Детали за повикот може да се најдат на сајтот и на фејсбук-профилот на „МакеДокс“, каде што е објавена и адресата на која треба да се испрати видеото. Повикот е отворен до 1 јули 2022, a резултатите ќе бидат објавени до 7 јули 2022 година.
Работилницата ќе биде распоредена во четири сесии и ќе се случува за време на: Патувачкото кино на „МакеДокс“ (20-24 јули); Филмскиот фестивал „МакеДокс“ (18-25 август); и две есенско-зимски сесии по договор (5-7 дена).
На работилницата, своите знаења и вештини во документаристиката ќе ги споделат членови на креативниот тим на „МакеДокс“, ланските докуникулци и докупријатели од други земји – докажани докупрофесионалци.
Учеството е бесплатно. Трошоците за сместување, превоз и храна се покриени, а треба да се има предвид дека сместувањето – особено за време на Патувачкото кино – не е во хотел со пет ѕвездички, туку понекогаш дури и под отворено небо, со милион ѕвезди, заедно со тимот на „МакеДокс“.
– Бараме млади луѓе, храбри да се изразат креативно и слободно и спремни да се впуштат во незаборавна авантура. Дванаесетмината величествени ќе бидат поделени во 3-4 помали групи со по еден ментор, а на крајот на работилницата, секоја група ќе треба да има готов креативен документарен филм – истакнуваат од „МакеДокс“.
ВАЖНО: Доколку си малолетен/на, заедно со пријавите, треба да доставиш и согласност од одговорен возрасен со која се одобрува твоето учество на работилницата.
*Патувачкото кино е неделив дел од „МакеДокс“ кој се случува низ руралните средини во Македонија.
(Текстот е објавен во „Културен печат“ број 133, во печатеното издание на весникот „Слободен печат“ на 18-19 јуни 2022)