Патниците на кои цената им е еден од најважните критериуми при изборот на одмор, би можеле да се израдуваат на новата листа на најповолни светски дестинации за 2026 година, која го издвојува бразилскиот град Салвадор како најприфатлив за патување.

Станува збор за градови ширум светот кои нудат спој на автентична атмосфера и пријатен престој, со хотелско сместување кое во просек чини помалку од 150 евра по ноќевање. Листата ја објави туристичката платформа „Expedia“ во извештајот насловен како „Поволни дестинации за 2026 година“.

На самиот врв се наоѓа Салвадор во Бразил. Градот е познат по златните песочни плажи, шарените куќи и историското јадро исполнето со барокни цркви и уметнички музеи.

Интересни факти за Салвадор

Салвадор бил првата престолнина на Бразил од 1549 до 1763 година, пред таа улога да ја преземе Рио де Жанеиро. Стариот град Пелорињо се наоѓа на листата на светско наследство на УНЕСКО и е препознатлив по калдрмите и колонијалната архитектура. Градот се смета за културно срце на афро-бразилската традиција, каде што настанале капоерата и специфичните музички правци. Исто така, карневалот во Салвадор е еден од најголемите во светот и привлекува милиони посетители.

Градот има брег долг над 50 километри со бројни плажи, а една од најпознатите знаменитости е „Елевадор Ласерда“, историски лифт кој ги поврзува горниот и долниот дел на градот, нудејќи спектакуларен поглед на заливот.

Второто место го зазема Гвадалахара во Мексико, важен финансиски и културен центар, кој воедно ќе биде еден од градовите домаќини на Светското првенство во фудбал во 2026 година.

Покрај Гвадалахара, на листата се најде уште еден мексикански град, Мерида, позната по спојот на наследството на Маите и колонијалната историја.

Меѓу десетте најповолни дестинации се најдоа и две големи јужноамерикански метрополи, Богота во Колумбија и Сао Пауло во Бразил. На листата се и популарните азиски градови Бангкок, Куала Лумпур и Хо Ши Мин, познати по живиот ноќен живот и евтината улична храна.

Листата ја затвораат Едмонтон во Канада, кој го носи прекарот „канадски град на фестивалите“, како и Санто Доминго во Доминиканската Република, еден од најстарите градови на Карибите.

Најповолни дестинации за 2026 година се:

1. Салвадор, Бразил
2. Гвадалахара, Мексико
3. Богота, Колумбија
4. Мерида, Мексико
5. Хо Ши Мин, Виетнам
6. Сао Пауло, Бразил
7. Бангкок, Тајланд
8. Едмонтон, Канада
9. Куала Лумпур, Малезија
10. Санто Доминго, Доминиканска Република