Лејкерси го „прегазија“ Мајами и поведоа во НБА финалето! (ВИДЕО)
Кошаркарите на Лос Анџелес Лејкерс ја совладаа екипата на Мајами Хит со 116:98 во првиот натпревар од големото НБА финале. Лејкерси на убедлив начин поведоа со 1:0 во завршната битка за титулата.
„Езерџиите“ доминираа против „жешките“, на моменти во текот на мечот имаа предност и од дури 30 поени разлика.
Такво нешто не се најавуваше барем на стартот од средбата, бидејќи играчите на тренерот Ерик Споелстра шутираа 7/7 за три и изненадија со 13 поени разлика, но составот на Френк Вогел веднаш се консолидираше, реализираше од скоро сите позиции и многу брзо ја стопи негативата.
Најефикасни во победата на тимот од ЛА беа Џејмс и Дејвис. Овој вториот запиша 34 поени (девет скока), додека „кралот“ постигнаа 25 поени (13 скока и девет асистенции).
Во редовите на Мајами прв стрелец беше Батлер со 23 поени, 18 додаде Нан, 14 Хиро, а 12 Крудер.
Треба да се напомене дека Хитси имаа кадровски проблеми, откако дуелот не можеа да го завршат Адебајо и Драгиќ поради повреди.
Вториот натпревар од финалната серија е закажан во ноќта помеѓу петок и сабота од 03.00 часот по македонско време.