Најмалку 58 лица се убиени во судирите во пакистанската покраина Белуџистан, вклучувајќи полицајци и цивили, соопшти полицијата денес.

Нападите започнаа во саботата со координирани напади од страна на Ослободителната армија на Белуџистан БЛА (BLA) врз училишта, банки, пазари и безбедносни инсталации низ целата покраина, објави Ројтерс.

Во градот Нушки, со население од околу 50.000 жители, бунтовниците ја презедоа контролата врз полициска станица и други објекти.

Седум полицајци беа убиени пред безбедносните сили да ја вратат контролата врз градот доцна во понеделник, додека операциите против БЛА продолжија на други места во покраината.

Нападите вклучуваа самоубиствени бомбашки напади, огнено оружје и напади со гранати на најмалку 11 локации, вклучувајќи го и Квета.

Бунтовниците зазедоа најмалку шест канцеларии на окружната администрација и се приближија на еден километар од канцеларијата на главниот министер на покраината.

Пакистанските безбедносни сили користеа беспилотни летала и хеликоптери за да ја вратат контролата врз Нушки и да ги потиснат бунтовниците.

Во градот се испратени повеќе војници, соопштија официјални лица.

БЛА тврди дека 280 војници биле убиени во операцијата „Црна бура“, но не даде докази.