Круг Филм: Почна снимањето на филмот „Живи и здрави“
Месецов почна снимањето на црногорскиот филм „Живи и здрави“ по сценарио и во режија на Иван Мариновиќ и во копродукција на македонскиот „Круг Филм“. Ова е втор филм на Мариновиќ.
Во продукцијата е црногорскиот „Адриатик вестерн“, а во копродукција се Марија Стојановиќ од српската „Сенс продукција“, Дејан Крајчевски од „Круг Филм“, Вероника Кухрова и Михал Крачмер од чешки „Аналог визија“, Анкица Јуриќ-Тилиќ од хрватската „Кинорама“ и Јожко Рутар од словенечкиот „Спок филм“.
Во филмот играат македонскиот актер Никола Ристановски, како и Тијана Лазовиќ, Горан Славиќ, Момчило Пиќуриќ, Горан Богдан, Сњежана Шишков-Синовчиќ, Дејан Ѓоновиќ, Мирјана Јоковиќ и Драгана Дабовиќ. Автор на музиката е македонскиот композитор Тони Китановски.
Приказната е за идна невеста која одбива да се мажи, па безмилосниот патријарх на семејството на младоженецот ѝ предлага да ја одглуми свадбата и следниот ден да оди каде сака. Невестата се согласува, иако младоженецот се надева дека таа ќе остане. Традиционалната свадба вбројува апсурдни настани, потопени во алкохол, пукотници и динамит, што ќе ги изнесе на виделина најлошите карактеристики на ликовите.
Проектот е поддржан од Филмскиот центар на Црна Гора, Филмскиот центар Србија, Чешкиот филмски фонд, Хрватскиот аудиовизуелен центар, Агенцијата за филм на С Македонија, Словенечкиот филмски центар, „Creative Europe MEDIA“, „SeeCinema Network“, „Eurimages“, „Порто Нови“, Туристичката организација на Херцег Нови и општина Херцег Нови.
Снимањето ќе заврши на 23 јуни, а ќе се одвива на локации во Црна Гора, во градовите Херцег Нови и Игало, како и на полуостровот Луштица.
(Текстот е објавен во ТВ и Филмски печат на 20 мај 2022 во весникот „Слободен печат“)