Ракометарите на Еурофарм Пелистер на најдобар начин ја започнаа новата сезона, со дебитантско учество на завршниот турнир во регионалната СЕХА лига каде го освои третото место, како и со триумф во македонскиот Суперкуп со драматична победа (23:22) над шампионот Вардар 1961 и најавија атак на титулите.

– Имаме одличен старт на сезоната со освојување на пехарот во Суперкупот и тоа против најголемиот противник Вардар. Одигравме машки во сите 60 минути, покажавме карактер кога беше најпотребно и задоволни сме од стартот на сезоната – вели крилото на Е. Пелистер и на македонската репрезентација, Ненад Костески.

Битолчани го победија Вардар на идентичен начин на кој минатата сезона ги загубија клучните натпревари и останаа без трофеите во првенството и во Купот. Во финишот од натпреварот, овој пат за разлика од минатата сезона кога Вардар славеше, Е. Пелистер влезе со негатива и успеа да направи пресврт.

– Овој пат ние победивме со пресврт. Во последните десетина минути влеговме со негатива од два гола, но успеавме да го свртиме натпреварот во наша корист. Играта и резултатот ни влеваат самодоверба и ни даваат за право да се надеваме на успешна сезона во која конечно ќе ја освоиме титулата – смета Костески.

Во новата сезона, Е. Пелистер влезе со шампионски амбиции и со речиси нов тим, во летниот преоден рок пристигнаа дури 10 нови ракометари, а промена имаше и на клупата каде Ларс Валтер го замени Жељко Бабиќ.

– Имаме речиси нов тим сезована со 10 нови играчи и нов тренер во Валтер. Тој донесе нов систем на работа и на игра засега дава добри резултати. За првпат игравме на завршен турнир во СЕХА лигата, триумфиравме на струшкиот турнир, го победивме Вардар иако почнавме буквално од почеток бидејќи екипата е речиси нова. Се наоѓаме на добар пат, имаме простор за напредок и се надевам на успешна сезона која посакуваме да биде крунисана со титула која долго време ја чекаат нашите верни навивачи – додава Костески.