Големата сцена на Македонската филхармонија на 20 декември 2025 година, со почеток од 19:30 часот, ќе биде исполнета со ориентално, фолклорно и длабоко емотивно музичко патување, предводено од моќниот и препознатлив вокал на македонската уметница Зарина Првасевда.

Со концертот „Кадифено“, публиката ќе влезе во свет на суптилна магија, богати мелодии и уникатни вокални интерпретации – доживување кое го носи печатот на редок талент и искрена уметничка визија.

Во време на доминација на едноличен и комерцијален звук, Зарина Првасевда јасно се издвојува со својот автентичен стил, широк вокален дијапазон и длабока музичка чувствителност. Таа е уметник во вистинската смисла на зборот – ја чувствува музиката како жив организам, црпејќи инспирација од традицијата, личните емоции и од природата.

Зарина го најавува концертот како „уникатно музичко патување“, исполнето со традиционални ритми, страст и виртуозност – простор во кој публиката ќе може да се отвори, да слуша и да доживее искрена, топла и жива музика.

„Кадифено“ претставува внимателно изграден спој од традиционални песни од Македонија, Турција и пошироко, усни приказни и наследени ритми – концерт со силна емотивна длабочина. Заедно со публиката ќе се истражуваат значењата и пораките на текстовите, културниот симболизам во народните традиции и заедничкиот дух вткаен во традиционалните танци.

– Луѓето ми се најголема инспирација – љубовта што ја разменуваме и искуствата што ги споделуваме се бесценети. Верувам дека највозвишениот аплауз за секој уметник е искрената реакција на публиката – споделува Зарина.

За првпат на сцена во Скопје, заедно со неа ќе настапат двајца врвни турски музичари и светски признати виртуози: Џенк Ердоган, еден од најголемите мајстори на фретлес гитарата и добитник на награда „Греми“ во категоријата најдобар њу-ејџ албум за 2021 година, и Ахмет Алан, харизматичен мултиинструменталист и перкусионист.

Нив ќе ги придружуваат и македонските музичари Андреа Мирческа, врвен басист и добитничка на наградата „Златен орикс“ за најдобар млад џез музичар, и Тони Арслан, професор, извонреден виолинист и солист во меѓународни оркестри – двајцата активни членови на бендот на Зарина.

Предновогодишниот концерт на 20 декември, во 19:30 часот, ќе биде премиерна изведба на музичкиот опус „Кадифено“ и ретка можност за публиката да доживее ново, поинакво и длабоко емотивно музичко искуство. Влезниците се достапни на веб-страницата drugastrana.mk.