Градоначалникот на Загреб, Милан Бандиќ ќе поднесе оставка на таа функција и ќе влезе во трката за претседател на Хрватска, пишува загребски Национал, повикувајќи се на неименувани извори.

Во случај на пораз во првиот круг, Бандиќ би ја подржал актуелната претседателка, Колинда Грабар-Китаровиќ, а потоа би зајакнал својата партија, станувајќи клучен коалициски партнер на идната влада, објавил хрватскиот неделник.

Новата градоначалничка на Загреб, во тој случај, би била Јелена Павичиќ Вукичевиќ.

Хрватскиот премиер, Андреј Пленковиќ за овој план дознал вчера.

За можната кандидатура на Бандиќ почнало повеќе да се збори по одбележувањето на „Олуја“ во Книн, кога Бандиќ рекол дека на Хрватска и е потребен „нов Туѓман“ и најавил дека „ќе рече нешто на крај на септември“, пренесува Индекс.хр.

– На Хрватска и е потребен нов Туѓман, човек кој ќе ги обедини луѓето за работа, знаење, демографска обнова и солидарност – рекол Бандиќ на 5 август во Книн.