Книжевен превод: „Будимир и ретките животни“ од Зоран Пеневски
Книгата за деца „Будимир и ретките животни“ од Зоран Пеневски, која е во издание на „Либи“, дел од „Арс ламина – публикации“, беше промовирана онлајн на 18 јуни. Станува збор за интересна книга наменета за сите љубопитни деца, кои сакаат да дознаат повеќе за ретките животни, и содржи духовита приказна што нè потсетува на тоа дека нас, како луѓе, нè определува и нашиот однос кон животните. Книгата „Будимир и ретките животни“ најпрвин е објавена во 2013 година, на српски јазик во издание на „Креативни центар“.
Зоран Пеневски (Панчево, 1967) е писател, сценарист и преведувач. Автор е на романите „Лектор“ (СКЦ Нови Сад, 2015), „Траги од отсуство“ (Океан, 2008), „Помалку важни злосторства“ (стипендија од фондот „Борислав Пекиќ“, Океан, 2005 година) и други. Има напишано и сценарија за повеќе стрип-албуми, но и приказни, текстови, прегледи, критики и есеи (за литература, стрипови, музика, илустрации и други). Има преведено повеќе од педесет книги (од англиски, германски и македонски јазик) и има уредено повеќе од сто изданија. Негови дела се преведени на англиски, француски, холандски и на македонски јазик.
(Текстот е објавен во „Културен печат“ број 36, во печатеното издание на „Слободен печат“ на 20-21 јуни 2020)