Книгата раскази „Делфинот“ од Александар Прокопиев е објавена во Бугарија
Познатото софиско книгоиздателство „Books4All“ („Книги за сите“) ја издаде книгата раскази „Делфинот (приказни за видливото и невидливото)“ на македонскиот автор Александар Прокопиев. Преводот на бугарски јазик е на Деница Проданова, а инвентивното решение на корицата на Стефан Пламенов.
Во препораката до бугарскиот читател на „Делфинот“ е напишано: „Мајстор на прозата, Александар Прокопиев умее да раскажува приказни што вовлекуваат во интригата, возбудуваат со своите емоции и на крај, но не и помалку важно – долго остануваат во вашите мисли“.
Претходната книга на Прокопиев преведена на бугарски јазик, „Човечулец“, беше под покровителство на истото книгоиздателство што го води издавачот, книжевен истражувач и критичар Пламен Тотев. „Човечулец“ имаше впечатливи претставувања за време на Меѓународната ноќ на литературата во Софија, како и во Македонскиот културен центар.
(Текстот е објавен во „Културен печат“ број 199, во печатеното издание на весникот „Слободен печат“ на 7-8.10.2023)