Клобучар се откажа од трката за потпретседател на САД и му предложи на Бајден да избере Афроамериканка
Асошиејтед прес пренесува дека Ејми Клобучар се откажува од трката за потпретседател на САД, и наместо тоа го повика демократскиот кандидат Џо Бајден да избере жена која не е бела.
„Ако сакате да ја излечите нацијата ова е начинот да го направите тоа“, рече Клобучар во интервју за телевизиската мрежа Ем-Ес-Ен-Би-Си.
Бајден во четвртокот ѝ возврати на Клобучар во порака на Твитер, укажувајќи на нејзината „грижа и решителност“ велејќи: „Со ваша помош, ќе го победиме Доналд Трамп“.
Шансите на Клобучар за потпретседателското место во кампањата се намалија по убиството на Афроамериканецот Џорџ Флојд од страна на бел полицаец во Минеаполис. Клобучар претходно беше обвинителка во округот во кој се наоѓа Минеаполис и во тој период повеќе од дваесетина луѓе, претежно од малцинствата, починаа при средби со полицијата.