Општина Тетово преку физибилити студија на јавна дебата предложи над реката Пена да се изградат летни тераси, кои ќе ги користат рестораните и кафулињата.

На тој начин како што изјави градоначалникот на Тетово Биљал Касами, кејот ќе добие поубав лик, а угостителството во тој дел на градот ќе се развие.

Смета дека одлуката ќе наиде на одобрување од граѓаните, а советот на општината ќе ја изгласа.

„Сетоа ова е во делот на ослободување на јавните површини покрај самата река кои досега ги изнајмувале угостителските објекти, а од друга страна со летните тераси над реката ќе се добие естетика, но и економски бенефит на кафулињата. Концептот е самите инвестори да ги изградат јавните тераси, а откако ќе се врати инвестиција тие ќе плаќаат комунална такса„, рече градоначалникот на Општина Тетово Биљал Касами.

И додека општината предлага решенија за поестетски изглед на Пена, кејот со децении се „дави“ во илјадници тони отпад. Што ќе се преземе во врска со оваа проблематика, градоначалникот со кус одговор.

„Летните тераси ќе бидат дополнителен мотив реката да биде почиста“, рече Касами.

На јавната дебата организира во Општина Тетово беше презентирана и физибилити студија, која предлага менаџирањето на јавното осветлување да го преземе јавно-приватно партнерство.

„Согласно одлуката на Владата ние зимава го гасиме уличното осветлување после полноќ, за да заштедиме струја. Но, според последните информаци од Секторот за финансии до крај на февруари, финансиската состојба ќе биде стабилизирана и од 1 март Тетово и после полноќ ќе имаме улично осветлување.Со концептот на јавно – приватно партнерство , приватниот партнер ќе го одржува јавното осветлување и со тоа нема да има рестрикции, како и дефекти на уличното осветлување“, дополни Касами.