Денес е тешко да се замисли свет без зачини. Брзата глобална трговија овозможи увоз и извоз на секакви вкусни состојки, со кои ни се доближија индиската, кинеската, виетнамската, малезиската и многу други кујни на нашите трпези, пренесува „Гардијан“.

Во новата студија, според Д-р Хсијао-Чун Хунг од Австралискиот национален универзитет и тимот научници, кои ги откопале најраните познати докази за подготовката на јадењето во регионот, зачинот кари веројатно бил пренесен во југоисточна Азија пред 2.000 години.

Анализирајќи ги остатоците од растенијата, на 12 антички алатки за мелење изработени од камен, а пронајдени во јужен Виетнам, откриени се траги од ориз, куркума, ѓумбир, галангал, каранфилче, морско оревче и цимет.

Истражувачите биле изненадени, кога откриле дека семките од морско оревче што ги ископале на ова место сè уште биле ароматични и два милениуми подоцна. Ситните зрна од куркума и ѓумбир биле најзастапени меѓу откриените зачини на ова место.

„Овие ситни зрна покажуваат дека зачините најверојатно се мелени, слично на гранулите кои се наоѓаат во современиот кари во прав“, рече Хунг.

Научниците ги ископале камените алатки, помеѓу 2017 и 2019 година, откривајќи дека се по потекло од Јужна Азија. Тоа ги навело да заклучат дека рецептите за кари биле воведени во југоисточна Азија од јужноазиски мигранти или посетители за време на раниот трговски контакт преку Индискиот Океан.

Истражувачите велат, дека клучниот артефакт, плочата за мелење со голема нога, пронајдена со антички ситни зрна ѓумбир, цимет и морско оревче на неговата површина, е сличен на оние кои традиционално се користат за подготовка на паста од кари и денес.