Каракачанов поднесе оставка: Не отстапувајте од заштитата на бугарските интереси во Македонија

Зоран Заев и Красимир Каракачанов
Зоран Заев и Красимир Каракачанов / Фото: EPA-EFE/GEORGI LICOVSKI

Претседателот на бугарското ВМРО, Красимир Каракачанов, денеска поднесе оставка од функцијата поради слабите резултати на партијата на вчерашните парламентарни избори, јави „Медиапул“.

Покрај него, оставки дадоа и неговите заменици – европратеникот Ангел Џамбаски, потоа Искрен Веселинов, Атанас Стојанов и Милен Михов. Стојанов, кој е градоначалник на Сандански, неколку часа пред оставката беше уапсен за купување гласови и задржан на 24 часа.

Каракачанов во последната политичка Влада беше вицепремиер и министер за одбрана. Тој, заедно со Џамбаски, е еден од најгласните пропагатори на тезите за бугарскиот идентитет на Македонците и за целосно „бугарска“ историја на македонското подрачје.

ВМРО зеде само околу 1 отсто од гласовите, според сегашните неофицијални резултати, што е далеку под цензусот за влез во парламентот. И на вонредните избори во јули не успеаја да влезат во парламентот.

Каракачанов, и покрај оставката, ги повика партиите што ќе влезат во парламентот да не отстапуваат „од заштитата на бугарските интереси во Македонија“.

– Кауза, што ние ќе продолжиме да ја браниме по цената на сè, напиша Каракачанов.

Видео на денот