Вчера се одигра и петтото коло од групата „2“ во Лигата Ц во кое Македонија на домашен терен со 2:1 ја совлада Естонија, а Ерменците беа подобри од Грузија (1:2).

Грузијците испаднаа од трката за првото место кое во води во повисокиот ранг „Лига Б“, па така во директна битка за врвот ќе решаваат Ерменија и Македонија в среда од 18.00 часот во Никозија, Кипар.

Шпанецот Жоакин Капарос е на селекторската клупа на ерменската репрезентација и посакува на крајот успешно со триумф да дојде до првата позиција во групата.

– Имавме одличен натпревар против Грузија, овие играчи покажуваат голема љубов кон националниот дрес и храброст да се брани честа на земјата. На секој меч одиме на победа. Знаевме дека ќе ни биде тешко против Грузијците кои се многу силна репрезентација.

Но, тешко ќе ни биде и против Македонија. Сите репрезентации во оваа група се еднакви, со еднакви можности. Со голема желба и сон ќе се подготвуваме за нашиот следен ривал. Македонците имаат силен тим, но ќе го дадеме максимумот за на крајот да успееме. Не се враќаме во Ереван, туку директно одиме во Кипар – вели селекторот на Ерменија, Капарос.