Ќе се согласите, роденденот е голем настан за секое дете, па слободно можеме да кажеме и најважниот ден во годината за повеќето деца. Доколку се вратите во своето детство сигурно ќе се сетите на вашите роденденски прослави и на лицето ќе ви се појави насмевка. Иако со тек на годините понудата на можности за роденденска прослава значително е зголемена и денеска можеме да одбериме прослава за своето дете, „разработена“ до нaјситни детали, а сè тоа за да ја видиме насмевка на детското лице, и возбуда за која долго ќе зборува по самата прослава.

Во денешно време децата го слават роденденот и три пати, бидејќи многу е тешко сите драги луѓе на вашето дете ги вклопите во една прослава. Така, детето го одбележува роденденот посебно со семејството, со децата од градинка или од училиштето и во кругот на големи и мали пријатели кои заземаат важно место во животот на детето. Секоја од наведените групи бара своја организација на роденденот, па иако можат да се поклопат со место и време на прославата, најчесто децата го слават роденденот во три прилики. Можеби, ако подобро размислиме, тоа и не е воопшто лошо, зашто на детето како најголем подарок му остануваат спомените на кои во иднина со задоволство ќе се сеќава. На многу родители пак, главоболка им преставува „дупката“ што ја остава роденденската прослава во домашниот буџет, меѓутоа, роденденот е еднаш во годината, затоа бидете попустливи.

Домашна прослава на роденденот

Домашната прослава на роденден има многу предности, особено ако живеете во куќа и имате двор кадешто можете да ја организирате прославата. Прославата дома ни овозможува да ги собереме драгите луѓе и деца и нѝ дава прилика ние возрасните да се забавуваме подеднакво како и децата, во добро друштво. Размислете колку пати во годината имате прилика да се соберете и опуштите со сите ваши драги луѓе во убава атмосфера, додека децата си играа. Да се слави роденден на дете на кој и возрасните одлично се забавуваат, звучи невозможно, нели? Добрата вест е дека воопшто не е невозможно, туку потребна е само добра организација.

Еве неколку идеи за загарантирана забава за прослава во домот:

1.Ангажирајте аниматор кој ќе смисли забава за децата. Доколку со време почнете со организацијата, ќе бидите во можност порано да резервирате термин, а со тоа можете да преговарате за подобра цена.

2. Обезбедете им на децата добра забава со изнајмување на дворец на надувување кој можете, зависно од димензиите, но и од вашиот простор, да го поставите на отворен или во затворен простор. Децата обожаваат движење и ваков вид на забава ќе ги фокусира на едно место, а вас ќе ви овозможи во опуштена атмосфера и без стрес да го поминете времето во добро друштво.

3.Децата ќе ги развеселите со кловнови или маскоти, кои се, инаку, омилени детски ликови. Нивната појава ќе предизвика задоволство кај секое дете.

4.Театарска претстава во вашиот дом е одлична идеја, а може и сами да ја направите.

Прослава на роденденот во градинка

Воспитувачите во градинките обично ја преземаат организацијата за прослава на роденденот во градинката, а нивното големо искуство ни гарантира дека децата ќе уживаат. За оваа прослава треба да се внимава каков вид на храна ќе се донесе во градинката. Најдобро би било пред самиот роденден да се консултирате со воспитувачките и да им ги кажете своите планови, па со нивна соработка да смислите каква храна треба да донесете за да се почестат децата.

Во организација на фирма

Денес постојат многу специјализирани фирми кои се занимаваат со организација на родендени во свој простор. Родителите го сакаат ваквиот вид на прослава, затоа што со кратка информација која ќе ја кажат за време на резервацијата за термин, целокупната организација им ја препуштаат на стручниот тим кој ќе се погрижи роденденот на детето да остане запаметен. Таков роденден денес може да прославите:

– Во кино со аниминиран филм, маскота и торта

– Во игротека каде што персоналот ќе се потруди тематски да го организира роденденот според желбата на детето.

– Во зоолошка градина, гледајќи ги животните и слушајќи интересни приказни за нив.

– Во куглана, каде може да се кугла на детска патека.

– На базен, во детски театар, во планетариум, во музеј

Можности има многу, на вас е да изберете која ви одговара. Не заборавете дека тоа треба да биде денот на вашето дете и ваша задача е да го направите тој ден – ден за паметење.