Во организација на Кајак кану клуб „Арка-Борец” Велес и со техничка поддршка од Македонската Кајакарската федерација, Агенцијата за млади и спорт и Општина Велес на реката Вардар во Велес се одржуваше Отвореното Балканско првенство во кајак на диви води во спуст.

Како што информира за МИА Љубомир Спасиќ од ККК „Арка-Борец“, на првенството учествуваа 120 кајакари од сите категории од 25 клубови од девет држави: Словенија, Хрватска, Босна и Херцеговина, Црна Гора, Србија, Косово, Албанија, Малта и од земјава.

Според судиите на натпреварите од Македонската кајакарска федерација натпреварите поминаа регуларно. Златните пехари во сите категории беа врачени со спектакуларен огномет и свеченост кој се одржа синоќа на Градскиот пливачки базен во Велес.

Со освоени 397 поени екипата на Кајакарскиот кану клуб „Арка-Борец“ од Велес е севкупен победник и го освои најголемиот златен пехар на Отвореното Балканско првенство во кајак на диви води спуст „Велес 2023“ што во изминатите два дена се одржа на Вардар во Велес.

Второто место со освоени 311 поени освои екипата на КК „Дрина“ од Бајина Башта од Р. Србија, а третото место со освоени 217 поени му припадна на КК „Чачак“ од Чачак, исто така од Р. Србија.

Беа доделени и златни, сребрени и бронзени метали во машка и женска конкуренција во сите категории. Од детска, јуниорска, сениорска категорија па сè до ветерани. За најмлад учесник – кајакар беше прогласен петгодишниот Јованче Андонов.

Коста Ефтимов од Македонската кајакарска федерација за МИА изјави дека натпреварите поминаа одлично, а организаторот се покажа на највисоко ниво како одлични домаќини. Јасна Милутиновиќ од Бајина Башта, мајка, чија ќерка беше една од добитниците на медали, за МИА изјави дека натпреварите биле одлично организирани и имаат гостопримливи домаќини и дека прекрасно се чувствуваат во Велес градот на Вардар.

фото/извор: МИА