Обвинителите денеска подигнаа обвинение против поранешната прва дама на Јужна Кореја, Ким Кеон-хи, за примање мито во натура – луксузни стоки како што се уметнички дела, накит и чанти – во вредност од над 200.000 долари и мешање во државните работи, пренесува Ројтерс.

Сопругата на поранешниот претседател Јун Сук-јеол беше уапсена во август и се соочува со низа обвиненија, вклучувајќи манипулација на берзата, пасивна корупција и прекршување на изборниот закон.

Во соопштението објавено по шестмесечна истрага, обвинителот Мин Џунг-ги изјави дека јужнокорејските институции се „сериозно потресени од злоупотребите на моќта од страна на г-ѓа Ким“.

Поранешната прва дама (2022-2025) „нелегално се мешала во државните работи во ходниците, подалеку од очите на јавноста“, објасни друга обвинителка, Ким Хјеонг-гјун .

Обвинителството ја обвинува поранешната прва дама за земање мито во вкупен износ од 377,25 милиони вони (223.000 евра) од бизнисмени и политичари. Таа, исто така, се тврди дека добила две чанти „Шанел“ и ѓердан „Граф“ од поглаварот на Црквата за обединување (ур.: секта на Месечината) Ха Хак-џа, како и луксузен накит, слика од познатиот јужнокорејски минималистички уметник Ли Ву-фан, чанта „Диор“ и рачен часовник.

Поранешниот претседател Јун негираше дека знаел за трансакциите кога бил испрашуван, обвинение кое обвинителката Ким рече дека на обвинителите „им е тешко да го прифатат“.

На почетокот на декември, обвинителите побараа 15-годишна затворска казна и парична казна од две милијарди вони (1,4 милиони долари) за поранешната прва дама, велејќи дека таа се однесувала како да е „над законот“ и „соработувала со религиозна организација, доведувајќи го во прашање одвојувањето на религијата и државата како што е загарантирано во уставот“.

Ким ги негира сите обвиненија, кои ги нарекува „длабоко неправедни“.

Поранешниот претседател Јун прогласи воена состојба – која траеше само неколку часа – во декември 2024 година, туркајќи ја Јужна Кореја во сериозна политичка криза.

Тој беше отстранет од функцијата оваа година откако беше прогласен за виновен за бунт, обвинение што тој го негираше.

Тоа беше прв пат во историјата поранешен претседател и неговата сопруга да бидат притворени по одделни кривични обвиненија.

Судот ќе ја донесе својата пресуда во случајот на Ким на 28 јануари.

Почна судењето на поранешната прва дама на Јужна Кореја поради корупциски скандали