Српскиот кошаркар на Денвер нагетс, Никола Јокиќ вели дека Словенецот Лука Дончиќ кој настапува за Далас маверикс би можел сезонава да биде прогласен за најкорисен играч (МВП).

Дончиќ и оваа сезона блеска во НБА лигата, тоа го потврди и на последниот дуел на Далас кој триумфираше токму против Денвер со 107:105 кога постигна 37 поени.

Јокиќ по завршувањето на мечот откри колку навистина го цени Дончиќ на кошаркарски план:

– Мислам дека 100 отсто ја заслужува титулата МВП. Но, тоа не е моја одлука, да бидам искрен – изјави Јокиќ во изјава за „АБЦ“.

Дончиќ сезонава има просек од 34,3 поени, 9,8 асистенции и девет скока. Тој одигра 58 натпревари и е на пат да ги достигне 65-те потребни за да биде во конкуренција за МВП наградата.

Она што не му оди во прилог е позицијата на Далас кој моментално е осми во Западната конференција.

Актуелен лидер во трката за МВП наградата е Јокиќ, за кого тоа би било трето вакво признание. Следуваат Шај Гилџес-Александер и Јанис Адетокумбо, додека Дончиќ е на четвртото место.