„Јас сум добро, страв ми е за децата“: Бугарскиот обвинител Гешев бил со сопругата и ќерките кога пукнала бомбата
Главниот бугарски обвинител Иван Гешев се огласи по денешниот обид за атентат на патот кон Самоков, откривајќи дека со него во моментот на експлозијата било и неговото семејство.
„Добро сум. Се плашам за децата!“ – кусо одговорил Гешев на барањето за негова изјава од новинарка на агенцијата „ПИК“ по денешниот драматичен настан, во кој, за среќа, нема повредени.
Експлозијата се случила околу 11:45 часот на патот Софија – Самоков, кај селото Ковачевци.
Според информациите на ПИК, покрај обвинителот, во колоната биле и неговата сопруга Детелина Ханчева и нивните ќерки Ивет и Далија.
Експлозивната направа експлодирала пред еден од автомобилите во поворката на јавниот обвинител. И покрај првичните информации дека е повреден обезбедувач на Иван Гешев, главниот секретар на МВР Петар Тодоров соопшти дека нема повредени.
