Израел ја одобри четврта доза за лица над 60 години и медицинскиот персонал
Израел ја одобри четвртата доза од вакцината „Ковид-19“ за сите луѓе постари од 60 години и медицинскиот персонал, објави во неделата премиерот Нафтали Бенет.
Бенет изјави дека Министерството за здравство ја одобрило одлуката два дена по одобрувањето на четвртата доза за групата граѓани со висок ризик.
„ Омикрон бранот е тука и мора да се заштитиме“ изјави Бенет.
Набргу по почетокот на вакцинацијата на ризичните групи, директорот на Министерството за здравство Нахман Еш ја одобри 4-тата доза за жителите на домовите за стари и изнемоштени лица.
Израел, освен тоа, во четвртокот ја доби првата пратка таблети за лекување на заболените од коронавирус од фармацевтската компанија Фајзер во време кога бројот на заразени со новиот сој омикрон продолжува да расте.
Галопирачки пораст на инфекции: „Наскоро можеме да предвидиме 50.000 нови случаи на ден“
Во изминатите денови Израел бележи огромен пораст на бројот на новозаболени , но засега не е потврдено ново зголемување на бројот на хоспитализирани пациенти.
Израелските власти во неделата потврдија 4.206 нови случаи на коронавирус за 24 часа и зголемување за 195 отсто за една недела, што може да го зголеми притисокот врз здравствениот систем.
„Регистрирани тешки форми на болеста кај невакцинираните“
„Наскоро можеме да очекуваме и по 50.000 нови случаи на ден“, предупреди Бенет, повторувајќи го повикот за масовна вакцинација за возрасни и деца кои сè уште не ја примиле вакцината.
Во земја од 9,2 милиони жители, во која повеќе од половина веќе добија засилена, т.н. бустер доза, потешки случаи на болеста се присутни кај невакцинираните, велат надлежните.
Од почетокот на пандемијата во Израел се регистрирани вкупно 1.394.407 заразени лица, од кои 8.244 завршиле со смрт, според официјалните податоци.