Израел во саботата испрати итна медицинска помош до заедницата Друзи во сирискиот град Свеида, велејќи дека потегот бил координиран со Вашингтон и Дамаск.

Министерството за здравство на Израел во саботата соопшти дека се подготвува да достави медицинска опрема и лекови до населението на Свеида, кое се соочува со тешки хуманитарни услови, објави израелскиот јавен радиодифузер Кан.

Претходно денес, вооружените бедуински племиња во Сирија соопштија дека се повлекле од Свеида по повеќе од една недела борби и прекин на огнот постигнат со посредство на САД, додека конвоите со помош почнаа да влегуваат во разурнатиот град во јужна Сирија, објави АП.

Судирите во регионот Свеида започнаа на 13 јули меѓу Друзите и Бедуините откако еден трговец од племето Друзи беше киднапиран и ограбен, предизвикувајќи одмазда од двете страни, објави Танјуг.

Сириската опсерваторија за човекови права со седиште во Лондон денес соопшти дека бројот на жртви во насилството во јужна Сирија, во кое учествуваа бедуини и Друзи, како и владини сили, вооружени племиња и Израел, надмина 1.000.