Изложбата на слики „Обоен ветар Фу“ на Блашка Миева е поставена во изложбениот салон „Империјал 2“ на Културно-информативниот центар во Скопје и содржи 13 дела работени во комбинирана техника (акварел и акрилик на платно), создадени последнава година.

Авторката ја следи традицијата на јапонската култура, каде што ветерот, односно движењето на воздухот е наречено Фу и му дава боја. Фу е духот на живеењето, а апстрактните форми со градација во боја и хармонија создаваат перцепција на хаотична убавина, која само навидум е хаотична.

Според авторката, ветрот со својот прогресивен движечки воздух е асоцијација за процес, прогрес, спиритуален раст, раздвижување, асоцијација за спиритуална надеж и, најважно, асоцијација за промена. Изложбата ќе биде отворена до 8 јули.

(Текстот е објавен во „Културен печат“ број 37, во печатеното издание на „Слободен печат“ на 27-28 јуни 2020)