Полицијата во Хонг Конг е мета на критики по објавената видео снимка на брутално апсење на 12 годишно девојче кое, како што тврди нејзиното семејство, е случајно приведено за време на протест додека одело во продавница да купи намирници.

Снимката, на која се забележува обидот на девојчето да ги избегне силите за безбедност, се шири на социјалните мрежи со брзина на светлината.

Припадник на безбедносните сили во еден момент ја соборува на земја по што веднаш е опколен од неколку свои колеги. Од 1 јули во Хонг Конг траат големи протести по новиот усвоен Закон за безбедност во Пекинг.

Мајката на девојчето за „Епл Дејли“ изјави дека планира да поднесе тужба и формално жалба. Таа вели дека нејзината ќерка и 20 годишниот син биле надвор со намера да купат работи за ликовно, а девојчето се обидувало да се оттргне од полицајците бидејќи било уплашено.

Погледнете го видеото од моментот на бруталното апсење:

Неколку часа по инцидентот, полицијата во Хонг Конг го потврди апсењето на 12 годишното девојче со образложение дека обидувало да побегне „на сомнителен начин“ и дека притоа е употребено „минимум неопходна сила“ за да биде совладана.

– Полицијата беше загрижена за учеството на млади лица на забранетите собири. Нивното присуство во хаотичните протести, исто така, ја загрозува нивната лична безбедност“, се наведува во полициското соопштение.