Исправена е печатната грешка во гласачките ливчиња во Општина Ново Село и материјалот е веќе доставен, гласањето таму за болните ќе се одвива непречено и сите ќе го остварат своето право на глас до крајот на денот, рече претседателот на Државната изборна комисија, Борис Кондарко.

Гласањето на болните и изнемоштените лица во Општина Ново Село утринава беше привремено прекинато поради техничка грешка во редните броеви на носителите на советничките листи на гласачките ливчиња.

Како што истакна Кондарко, одговорајќи на новинарски прашања по јавната седница на ДИК, денешното гласање генерално се одвива без никакви проблеми, материјалот е навреме дистрибуиран од општински изборни комисии до соодветните избирачки одбори и граѓаните непречено го остваруваат своето избирачко право.

-Досега немаме никакви приговори и забелешки од ниту една општинска изборна комисија и од ниту едно избирачко место – рече Кондарко.

Според него, податоци за излезноста засега нема, зашто гласањето трае до крајот на денот, а кога ќе заврши, ДИК ќе објави колку од пријавените лица за гласање во домашни услови и во старски домови го оствариле своето гласачко право.

-Пред завршување на гласањето, околу 16 часот, ќе објавиме пресек, а по завршување на гласањето ќе објавиме и целосен процент на излезност – рече тој.

Кондарко потсети дека не денеска, туку утре ќе бидат објавени резултатите од гласањето на овие категории лица.

Не гласале болните и изнемоштените луѓе во Ново Село – имало грешка на гласачките ливчиња