Владимир Штимац со 18 години како еден од најголемите таленти се пресели во литванскиот кошаркарски гигант Жалгирис.

Преселбата во Литванија претставуваше голема промена во животот на младото и голобрадо момче кое во одредени моменти немал што да јаде, а платата ја праќал дома бидејќи тоа било единствен начин да заштеди, но и да му помогне на своето семејство.

Штимац од првата плата си купил компјутер, мобилен телефон и плејстејшн. Бидејќи заминал како тинејџер, тој немал контрола колку пари троши и поради тоа одлучил откако ќе плати кирија за станот, ќе издвои пари за храна и ќе задржи одредена сума за џепарлак, остатокот од парите го праќал дома кај родителите. Сепак, неколку пати „се пресметал“, пратил повеќе пари отколку што треба.

– Немав пари и имаше моменти кога фрижидерот ми беше празен, а јас бев гладен. Од клубот добив на користење автомобил, но немав пари да наточам гориво – вели Штимац кој со репрезентацијата на Србија беше европски, светски и олимписки вицешампион.

– Ми беше срам да им се јавам на родителите и да им кажам да ми пратат пари – се потсетува кошаркарот на Црвена звезда и открива во тие моменти дека највеќе му помогна тогашниот хрватски репрезентативец, Марко Поповиќ.

– Иако ми беше срам, му се јавив на Марко. Му објаснив дека сите пари ги пратив дома и дека немам доволно за да одржам до наредната плата. Ми кажа да не се грижам, дека ќе ми помогне и ќе ми позајми пари. Многу ми помогна во тие моменти, ме викаше на ручек кај него. Исто така ми даде неколку важни совети и ми објасни како да ги распоредам парите, да не трошам на глупости. Сакаше да ми помогне, јас бев млад и неискусен – вели Штимац за литванскиот портал 15min.lt.

Тој исто така се потсети на една ситуација во Жалгирис кога токму Поповиќ го искара на еден тренинг.
– Не се ни испоти, што правиш? Ми викаше кога виде дека не се трудев како останатите. Многу ми значеше неговата помош и никогаш нема да го заборавам тоа.