Иран со пустински температури од 50 степени, утре и задутре се неработни денови
Температури од над 50 Целзиусови степени, загаденост на воздухот и песочни бури се очекува утре и задутре да го зафатат Иран. Владата на Иран ги прогласи среда и четврток за неработни денови поради „досега невиден“ топлотен бран. Денеска температурите ширум целата држава беа над 45 степени Целзиусови, јави ДПА.
Филијалите на банките, судските и правните канцеларии ќе бидат затворени, а испитите и фудбалските натпревари ќе бидат одложени. Болниците се во состојба на готовност.
Во курдскиот град Дивандаре, жителите вчера излегоа на улиците за да го изразат своето незадоволство затоа што им било прекинато водоснабдувањето.
Голем дел од Иран, земја со речиси 90 милиони жители, е пустина. Научниците со години предупредуваат на се почести суши во регионот, кој е особено тешко погоден од последиците од климатската криза.
